მაცხვარიშის მაცხოვრის ამაღლების ტაძარი

ლატალის თემში, სოფ. მაცხვარიშის მაცხოვრის ამაღლების სახელობის ტაძარი მეათე-მეთერთმეტე საუკუნეშია აშენებული. აქიდან წარმოსდგება სოფლის სახელი “მაცხვარიში”
თლილი ქვით აშენებული ტაძარი მიგვითითებს, რომ სვანეთი ქართული კულტურის, სულიერების და სახელმწიფოებრიობის განვითარების ერთ-ერთი უძველესი კერაა.

ეკლესია მოხატულია, ფრესკული წარწერების საფუძველზე დადგენილია, რომ იგი მოიხატა დემეტრე პირველის მეფობის მე-15 წელს, 1140 წელს: “მოიხატა საყდარი ესე მეფისა დემეტრესა წრლსა (იე) ხელთა მიქაელ მაღლაკელისათა.”

ტაძრის მოხატულობა მნიშვნელოვან ისტორიულ ფაქტს გადმოგვცემს – დავით აღმაშენებლის ძის, დემეტრე პირველის მეფედ კურთხევის ცერემონიალს. ამ მხატვრობას, კომპოზიციის თვალსაზრისით, ანალოგი არ მოეძებნება: ფრესკაზე მეფე დემეტრეს ხმლით მოსავს ორი ერისთავი, მათგან ერთ-ერთი დიდებული – სვანთა ერისთავი ვარდანისძეა.
ტაძარში დაცულია მრავალი სიწმინდე, მათ შორის მეთორმეტე საუკუნის ვერცხლის ჯვარი  -ტიხრული მინანქრით და სევადით შესრულებული მედალიონებით შემკული. რომელიც ითვლება ბიზანტიური ოქრომჭედლობის ერთ-ერთ მნიშვნელოვან ნიმუშად.
ტაძარში მინაშენის კართან ბერის სამოსში გამოსახულია კვირიკე მამასახლისი, გვერდით შესრულებულ ვრცელ წარწერაში ვკითხულობთ მის ანდერძს: “ვინც ამ ეკლესიის მამასახლისი იყოს კვამლისაგან შეიკრძალეთ ხატული, რათა ფერი არ დაიკლოს.”

მაცხვარიშის ტაძარს შემორჩა ორნამენტებით შემკობილი ძველი ხის კარები. ეს ეკლესია ეროვნული მნიშვნელობის კულტურის უძრავ ძეგლთა სიაშია შეტანილი.

მაცხვარიში 2

მადონა წერედიანი, სოფ. მაცხვარიში.



კომენტარები სტატიაზე