16 აპრილს მესტიისა და ზემო სვანეთის მიტროპოლიტმა ილარიონმა (ქიტიაშვილი) აღდგომის ბრწყინვალე დღესასწაულის წირვა მესტიის მაცხოვრის აღდგომის სახელობის საკათედრო ტაძარში აღავლინა.
მან ქადაგებაში მრევლს მიულოცა აღდგომა და კიდევ ერთხელ შეახსენა იმ მოვალეობების შესახებ რომელნიც ადამიანებს უფლის წინაშე გაგვაჩნია, მან აღნიშნა:
“მიუხედავად იმისა არის თუ არა ადამიანი ეკლესიური, ბოლოს ყველა წარსდგება ღვთის წინაშე მისი ვალდებულებებით, წარსდგება სამსჯავროზე მისი ცხოვრებით, იმის მიხედვით, თუ როგორი სინანული გააჩნდა აქ, აქ ამ ქვეყნად უნდა მოვასწროთ, რადგან იქ უკვე სინანული აღარ არსებობს. ადამიანმა უნდა გააცნობიეროს განცდა თვისთა ცოდვათა. გააცნობიეროს საკუთარი თავი. მთავარი ფორმულა ქრისტეში არის სინანული, რომელსაც მოყვება: სიყვარული, მიმტევებლობა, განგდებული არის ამით შური, ბოროტება, სიძულვილი, რომელნიც დღეს ასე გვარტყია გარშემო. ინებოს ღმერთმა, რომ თანამდები იყოს თქვენთა ყოველთვის დღევანდელი დღის სიხარული, თქვენს ოჯახებში შემოსულიყოს სიხარული ქრისტესი და ჩვენ ერთად ვილოცოთ იმისთვის, რომ ამ დაძაბულ ვითარებაში, რაც დღეს მსოფლიოში ხდება, ჩვენს ქვეყანაში ვერ მოიკიდოს ფეხი ბოროტებამ. უფალმა იესო ქრისტემ და ყოვლადწმინდა ღვთისმშობელმა მოგვცეს მშვიდობა. თქვენს ოჯახებს მისცეს უფალმა სიმშვიდე და დღეგრძელობა!
ქრისტე აღსდგა!”
მადონა წერედიანი, დაბა მესტია.