1 ივნისს, ბავშვთა დაცვის საერთაშორისო დღესთან დაკავშირებით ლენტეხის სამხატვრო სკოლის მოსწავლეებმა მ. ხერგიანის ქუჩის მონაკვეთი მოხატეს. ნახატებზე ასახული იყო ბავშვთა თავისუფალი, ლაღი და ფერადი სამყარო.
მოსწავლეებს მიეცათ დავალება შეექმნათ სპონტანურად მოფიქრებული ნახატები, სპეციალურად ამ დღისადმი მიძღვნილი. ნახატები შესრულდა ფერადი ცარცით. საჭირო მასალა მოსწავლეებმა თვითონვე მოიმარაგეს, რის შესახებაც 2 დღით ადრე იყვნენ გაფრთხილებულნი პედაგოგების მიერ.
აღნიშნული ღონისძიება ტრადიციულია. სამხატვრო სკოლის დირექტორის ქალბატონ თამილა ლიპარტელიანის თქმით ბავშვთა დაცვის საერთაშორისო დღეს ასეთი სახით უკვე 6 წელია რაც აღნიშნავენ, მანამდე კი სამხატვრო სკოლის მოსწავლეები ამ დღესთან დაკავშირებით სხვადასხვა თემაზე შექმნილი ნახატების გამოფენებს ჯ. მეშველიანის სახელობის სკვერში აწყობდნენ-ხოლმე, რომელთაც მისივე თქმით ბევრი დამთვალიერებელი ჰყავდა. ჩემის აზრით კი ამას ისიც უწყობდა ხელს, რომ იმ დროისათვის აღნიშნული სკვერი ბევრად მოწესრიგებული და კეთილმოწყობილი იყო.
გვანცა ქურასბედიანი.