1-ივნისს, ბავშვთა დაცვის საერთაშორისო დღესთან დაკავშირებით, მესტიას ქუთაისის იაკობ გოგებაშვილის სახელობის თოჯინების თეატრი ესტუმრა. პატარებისთვის თეატრმა წარმოადგინა სპექტაკლი “სამი გოჭი”, რომელმაც ბავშვების დიდი მოწონება დაიმსახურა, მათ სანახაობამ მხიარული განწყობა და დაუვიწყარი შთაბეჭდილებები შეუქმნა.
აღნიშნული თეატრი მესტიის მუნიციპალიტეტის გამგეობის დაფინანსებით ჩამოვიდა. ამასთან დაკავშირებით, მესტიის გამგეობამ ინფორმაცია წინასწარ მიაწოდა მოსახლეობას, რასაც დამსწრე საზოგადოების და ბავშვების სიმრავლეც მოწმობდა.
ამ მეტად მნიშვნელოვანი თარიღის აღნიშვნას, სხვადასხვა ღონისძიებებით შეუერთდნენ მესტიის მუნიციპალიტეტის საჯარო სკოლები და ბაღები. მათ შორის იყო მესტიის წმინდა ილარიონ ქართველის სახელობის სკოლა-გიმნაზია, რომლის მოსწავლეებმაც სხვადასხვა მხიარულ აქტივობებთან ერთად მოხატეს სკოლის მიმდებარე ქუჩები, თავადაც იხალისეს და საზოგადოებაშიც დადებითი განწყობა შექმნეს.
მადონა წერედიანი, დაბა მესტია.