22 ივლისს, მესტიისა და ზემო სვანეთის ეპარქიის სოფელ ლატალში, მესტიისა და ზემო სვანეთის მიტროპოლიტმა ილარიონმა (ქიტიაშვილმა) აკურთხა ასი ათასი მოწამის სახელობის ახლადაშენებული ტაძარი. ტაძრის ქტიტორია ლატალელი გიორგი (როსტომ) გირგვლიანი.
აღსანიშნავია, რომ ლატალი არის ისტორიული სოფელი, რომელიც გამოირჩევა კულტურული მემკვიდრეობის სიმდიდრით. გადმოცემით ამ სოფელში, სვანეთის მასშტაბით ყველაზე ბევრი ტაძარი ყოფილა. მარტო სოფ. ლატალში ტაძრების და ნატაძრალების საერთო რაოდენობა, ახალი ტაძრის კურთხევამდე, 67-ი იყო, ხოლო მათგან ექვსი იყო მოქმედი ტაძარი. თუმცა ქართველი წმინდანების სახელზე აშენებული ტაძარი აქამდე ლატალში არ ყოფილა, ამიერიდან კი ლატალში შვიდი მოქმედი ტაძარი იქნება და ამ სოფელს სხვა წმინდანებთან ერთად ასი ათასი წმინდანის მადლი დაიფარავს.
ლატალის ასი ათასი მოწამის სახელობის ტაძრის წინამძღვარია სქიმარქიმანდრიტი ეგნატე (კურტანიძე).
ფოტოზე შუაში:მესტიისა და ზემო სვანეთის მიტროპოლიტი ილარიონი (ქიტიაშვილი)
მადონა წერედიანი, სოფ. ლატალი